為咗起屋到底各地政府可以去到幾盡？近日面對國內土地供應問題嘅新加坡政府就作出咗一個重大決定，就係將1842年成立、有181年歷史嘅新加坡賽馬會土地用作建設公共房屋「組屋」以及休閒設施。
據了解，新加坡賽馬會Singapore Turf Club周一就宣布會喺明年舉行第100屆新加坡金盃賽事，呢場比賽亦將會係克蘭芝馬場嘅「閉幕賽」，之後克蘭芝賽馬場120公頃嘅土地就會交還畀政府，用作建設公共房屋「組屋」。對於呢個決定，雖然新加坡賽馬會表示傷心，但近年嚟馬場入場人數已經不斷減少，而國家發展亦都需要用地，為咗呢一點而作出取捨佢哋都係表示理解。
新加坡賽馬嘅歷史相當悠久，早喺1842年就由蘇格蘭商人里德引入並牽頭成立新加坡競賽會，當時亦都只係用花拉公園嘅場地賽馬，但隨住呢項活動日漸受歡迎，馬場就先後搬到新加坡中部武吉知馬以及2000年建立嘅克蘭芝。呢次政府嘅決定，就係將新加坡逾180年歷史賽馬畫上句號，都算係一個圓滿嘅落幕。
原圖嚟自網絡