擁有明清兩代皇家珍寶嘅加持，令故宫成為收藏最多中國文物嘅博物館。除咗地面建築，故宮仲有神秘嘅地下文物庫，等一批有一批嘅文物有個家。今日就同大家齊齊探秘，揭開寶庫嘅神秘面紗。

收藏180萬件文物嘅故宮，目前有超過八十萬件放於地面嘅古建築庫房入面。而故宮文物地庫暫時分為第一同第二期，先後於1991同1997年建成，收藏約97萬件寶物。故宮今年展開擴建工程，完成之後會較原本面積大咗四成，預計於2020年完成，以迎接紫禁城600歲生日。到時，約110萬件、相當於總數六成嘅文物會根據等級同其他條件，住入適當嘅恆溫恆濕地庫。

根據資料，目前故宮地下文物庫分為三層，採用架空結構，六個平面都唔會接觸到泥土，下面有支柱撐起，可以防潮防水。所有文物入庫前都要「淨身」，即係要經過蒸熏嚟消毒滅蟲，然後歸到度身訂造嘅箱內，再分配入唔同嘅兩米高鐵櫃。庫房恒溫15度，設有自動感應嘅滅火裝置。保安方面，地下文物庫有n道防盜鐵門，並採用雙鑰匙制，保安員同鑰匙房各一條，保安每日會入內巡查兩至三次，人走就熄燈，安全又穩陣。

講咗一大輪，究竟地下文物庫响邊？因為安全起見，故宮從來唔會對外透露地下文物庫嘅位置，所以阿史只能答你：喺故宮。

圖片嚟自網絡。