早兩日翻煲星爺套《鹿鼎記》，睇到韋小寶入天地會之前要斬雞頭，又要驚又要斬之下，劈到拎雞人隻手，飆曬血。其實喺香港開埠初期，法制仲未完善，不過證人上法庭做證同樣需要宣誓，當時絕少華人信基督教，自然就唔會拎住本《聖經》，咁佢哋係用咩方式宣誓呢？同星爺一樣，手起刀落！

當時本地華人用「斬雞頭」嘅方式宣誓，一手揸住隻雞，對神明發誓就話「本人所講一切都係真話，如有半句謊言，就如同此雞！」講完之後就斬甩雞頭，表示自己清白可信。後來有啲華人又請天后、關公等到法庭宣誓，搞到法庭七國咁亂。

部份人斬完雞頭、請完關公都仲係講咗大話，所以律師安斯德喺1868年寫咗篇文章，題為《關於對異教徒所採用的誓詞》，表示咁做根本唔能夠保證供詞的真實性，認為各種以民間習俗方式宣誓損害法庭尊嚴，建議禁止。建議得到唔少法官支持，最終1889年立法確認，只接受佛教同道教嘅宣誓方式，其他一律「無得留低」。

劇照嚟自網絡。