喺1923年6月26日夜晚9點幾,紫禁城建福宮發生大火,當局得知消息後,立即派出消防隊救火,但因為宮內缺乏自來水,又無水井,令火勢蔓延。意大利公使館派咗三十幾個士兵嚟幫手,先逐漸將火救熄,但大批珍寶已經毀於一旦。覺得差唔多成百年前嘅事好遙遠?咁帶大家返回2017年,當時美國總統特朗普到北京訪問,參觀紫禁城時,都响建福宮食過餐飯。

講返場大火,絕對可以話令紫禁城係損失慘重。據講清理火場嗰陣,執到嘅熔化佛像、經版、銅、錫等就有超過500袋,金片銅片及損毀玉器就有40幾箱,仲未計啲字畫、瓷器等等。

至於點解建福宮有咁多珍品,末代皇帝溥儀就曾經講過,話以前乾隆皇帝將自己喜歡嘅珍品都放喺建福宮,逐漸令建福宮成為一個珍寶庫房,喺乾隆去世之後,嘉慶就將建福宮封存,直至發生大火。溥儀估計,係有太監監守自盜,偷走入面嘅珍品,然後放火試圖毀滅證據。

原圖取自網絡。