近排成為熱門話題嘅加拿大，當地有唔少華人居住，其實唔單止佢哋，好多年華人已經對加拿大作出貢獻。話說19世紀加拿大聯邦建立之後，為連貫隔咗成幾千公里嘅東西海岸，於是拍板修築太平洋鐵路，前前後後請咗超過一萬五千個華工負責最險峻、最艱險嘅洛磯山脈一段。

根據資料，第一批華工係嚟自廣東，九成為台山人。漂洋過海嘅華工去到白人世界之後飽受歧視，人工低過白人一大截，據講當時要响零下三四十度嘅環境下工作超過十粒鐘，發放嘅糧食又無咩營養，搞到唔少人患上壞血病。修築鐵路嘅位置地勢險要，華工要用木材搭橋通過，有時仲遇到成百磅嘅石頭轆落嚟，造成唔少傷亡。

太平洋鐵路1885年完工，全長三千幾公里，據講有四千多名參與工程嘅華人魂斷當地。不過加拿大「打完齋唔要和尚」，鐵路竣工之後，當地通過《華人入境條例》，開徵高額度嘅人頭稅，限制華人入境同定居。2006年加拿大時任總理哈珀坦承，「鐵路完工一刻，加拿大就背棄咗華工。」

原圖嚟自網絡。