之前有新聞話，美國特朗普政府考慮要求中國政府償還清朝1911年辛亥革命未爆發前所發行嘅債券，計埋通脹、利息等等，話金額足足有成1萬億美元。唔少報道同分析話，特朗普係想利用呢啲債券作為貿易戰嘅談判籌碼，用嚟牽制中國。阿史今日就同大家介紹吓呢啲債券嘅歷史。

報道提到呢批債券名為「湖廣鐵路五厘利息遞還金英鎊借款債券」（湖廣債券），係清政府响1911年修建湖廣鐵路時，向英、美、德、法等國家銀行發行嘅國債，利息5厘，為期40年。呢批債券發行20同100英鎊兩款面值，總額達600萬英鎊，債券上面印有火車頭圖案，而左下方就有清朝「郵傳部印」同郵傳大臣盛宣懷親筆簽名。除咗簽名同印章之外，全部內容都係用英文寫成。

不過呢批債券發行咗無幾耐，辛亥革命爆發，中國改朝換代，之後民國政府曾經繼續支付利息，直至1937年抗日戰爭爆發，民國政府就停止支付利息。喺新中國成立之後，中國政府唔承認呢批債券。

後來喺1979年，有班美國人入稟地方法院，要求中國政府兌現呢批湖廣債券，法院受理案件並且向中國政府發傳票，但中國外交部拒絕應訊，最終中國政府被判敗訴。當時判決書提到，根據國際法原則，國家政府更替唔影響原有嘅權利同義務，作為清政府同民國政府嘅繼承者，中國政府有義務償還債務，而美國1976年《外國主權豁免法》亦規定外國國家商業行為係唔可以享受主權豁免。

不過之後美國國務院就向法院提交說明，指出1976年《外國主權豁免法》無追溯力，令1911年發行嘅湖廣債券屬於主權豁免範圍之內。中國政府亦响1983年委派美國律師提出撤銷判決，指出主權國家喺外國法院有豁免權、發行公債屬主權行為非商業行為，興建湖廣鐵路目的係鎮壓革命軍，債券屬於「惡債」，政府毋須繼承。最後法院以「主權豁免」為由撤銷原本判決。

圖為湖廣債券、特朗普，取自網絡。