做皇帝其中一個好處就係有錢，歷史上唔少皇帝一繼位之後就大興行宮、使錢好似倒水咁。但偏偏道光帝就反其道而行，慳得就慳，自己慳之餘中要求成個後宮、朝廷一齊慳，可以話係史上最慳家嘅皇帝。

道光年間，英國向清朝輸入鴉片，導致大量白銀流出清廷，道光為咗挽救國家財政危機，決定以身作則，節省開支。道光究竟有幾慳？據史載，有一年皇后生日宴客，來賓一人一碗打滷麵，麵入面嘅豬肉仲係道光「特批」御膳房劏嘅兩隻豬，已經好豪㗎喇！

唔單止食方面慳，道光仲下令後宮佳麗唔准著靚衫，連佢本人嘅衫爛咗都係拎去補返。但當道光發現補佢件衫嘅費用比大臣貴幾十百倍嘅時候，竟然要求妃嬪學針黹，以後啲衫爛咗自己補就得，唔使花錢俾人補，呢招認真絕！

原圖嚟自網絡。