波士有個習慣，就係智能電話出現咗咁多年，仍然會每朝喺公司食早餐嘅時候，拎住份報紙嚟睇。對報紙嘅鍾情，全公司應該冇人比得上佢。

見到波士睇報紙個樣，就令阿史諗返起上年歷史博物館一個展覽，入面就展出咗香港第一份中文同英文報紙，原來都真係有百幾年歷史。唔講唔知，原來計埋人口比例，香港係全世界人均擁有最多中文報紙嘅地方。不過，响香港第一份出現嘅報紙就唔係中文報紙，反而係英文報紙。呢份英文報紙名為《Hong Kong Gazette》（香港公報），喺1841年5月1號創報，屬於半月刊類型，就咁聽名都知呢份其實係類似憲報類型嘅報紙。

至於第一份中文報紙《遐邇貫珍》，就要等到1853年8月1號創報，係由馬禮遜教育學會出版，香港中環英華書院負責印刷。原本《遐邇貫珍》只係屬於教會內發放嘅刊物，但內容上全面，涉及到時政、文化以及科學，因此都被歸類成報紙。《遐邇貫珍》自創報以來以月刊形式出版，一直到1856年5月1號停刊。

至於點解會停刊呢？原來唔係同銷量有關，而係當時總編輯理雅各做咗英華書院嘅校長，工作太忙所以停刊。停刊之後其實個故事仲未完，就係個批印刷機構後來俾王韜同黃勝買咗，仲响1874年創辦咗香港第一份華人資本出版嘅報紙《循環日報》。理雅各、王韜、黃勝呢幾位仁兄相信對香港史有認識嘅史友都應該相當熟悉，關於佢哋嘅故事下次再講。

圖片嚟自網絡