第一間現代銀行 – 東藩匯理銀行 | 區區有故講

阿史前個排同個中學同學食飯，呢位同學仔依家喺某家大銀行工作。食食吓佢問咗我一個問題，邊間銀行係香港第一間銀行？

問得阿史，阿史梗係會俾個答案佢啦！香港第一家以現代銀行模式運作嘅銀行，唔係大家熟悉嘅匯豐或渣打，而係一間東藩匯理銀行嘅銀行。呢間銀行前身係總部設於印度孟買嘅西印度銀行。呢間銀行喺1845年將總部遷去倫敦，改名為The Oriental Bank Corporation，同時喺香港開設分行，中文名叫東藩匯理銀行。就係咁，香港就出現得一間現代銀行。唔講唔知，呢間銀行原來仲係香港第一間發鈔銀行，喺1857年，香港政府宣佈政府庫房接納東藩匯理銀行嘅鈔票，作為繳納稅款及其他款項之用。

東藩匯理銀行喺十九世紀中期可以話係香港「冧巴溫」銀行，經營規模上連香港上海匯豐銀行和渣打銀行都唔夠佢鬥。不過，呢間銀行响斯里蘭卡向咖啡商大量貸款，結果咖啡失收，好多貸款追唔番，就咁呢間香江第一間現代銀行喺1884年宣佈破產。