第一齣港產片

香港素有東方荷里活嘅美譽，曾經係全球五大電影生產同出口基地，亦產生咗多位喺亞太區極具影響力嘅明星。簡單而言，本土電影陪伴住幾代嘅香港人成長。但係大家有無諗過，香港第一齣港產片係邊套呢？

阿史查一查資料，發現香港第一齣港產片尚存爭議，唔少人就認為香港第一齣港產片係1913年嘅《莊子試妻》。呢齣電影由黎北海導演兼任男主角「莊周」，黎民偉任編劇兼反串飾演莊子妻子，故事大概講述主角莊子以詐死來考驗妻子係咪對自己忠貞。不過唔講唔知，呢齣片長15分鐘嘅電影原來無喺香港上映過。

至於另一齣被視為首齣港產片係1909年嘅作品《偷燒鴨》，呢齣電影係由梁少坡自導自演，而黎北海亦有參與其中。不過，呢齣電影雖然向香港拍攝同香港人創作，但由於電影唔係出自香港公司，所以有人覺得呢齣電影唔應該當作第一齣港產片。