估下呢七塊石點解會出現？

細細個成日都會聽到維多利亞城呢個名，但到底呢個冇城牆嘅城，實際位置又响邊度呢？答案原來係由七塊石去界定。

維多利亞城嘅位置其實同當年華人口中流傳嘅「四環九約」相近，所以呢七塊被用嚟圍繞多利亞城界碑，又有四環九約界碑嘅稱呼。講番維多利亞城，其實早喺1841年英國人登陸水坑口嘅時候，就已經打算將成個港島西北部發展成香港嘅中心區域，而呢個區域就係以聖公會聖約翰座堂做中心嘅維多利亞城。雖然係以「城」做稱呼，但早年並冇設立有形嘅界線，只係去到1903年港英政府為咗訂立邊界法例同埋令到華人更清楚呢個範圍，先至決定放置界碑。

早年中環就係政治經濟中心，兩邊就設有軍營，而堅尼地城到銅鑼灣，都係以工業為主，成個城嘅規劃就係咁。至於界石，馬己仙峽道15號界石就喺2007年6月被移除，現存就只係得番六塊，包括堅尼地城臨時遊樂場、龍虎山士美菲路同薄扶林道交界、龍虎山克頓道、扯旗山舊山頂道、跑馬地寶雲道同埋黃泥涌道。