初七人日點解人人都生日？

不知不覺就已經嚟到年初七人日，亦即係「人勝節」、「人七日」，簡單啲講就即係大家嘅生日，雖然聽就聽到好多年，但各位史友又知唔知當中嘅原因呢？畀個提示大家，係同女媧有關。

喺中國古代傳說入面，世上嘅生靈萬物都係由女媧創造，按照漢代東方朔《占書》記載「初一是雞，初二是狗，初三是豬，初四是羊，初五是牛，初六是馬，初七是人，初八是穀。」，由於初七所創造嘅係人類，於是呢一日就直頭當埋係人嘅生日，順帶講埋，第九日係天嘅生日，而第十日就係地嘅生日。

話明係生日，古人又會點樣慶祝呢？南方人傳統就會「撈魚生」或者食「及第粥」、江南地區就會食「七寶羹」，北方就食麵。至於習俗方面，老一輩就會戴上「人勝」，其實就即係一種剪彩加上一啲配飾軟金銀咁，之不過依家好難見到有人咁做喇。