尋日馬鞍山大火，响手機上好多群組都有火龍燒山嘅相。其實每當有火災時阿史都好驚，因為總會造成好大破壞，甚至會有人命傷亡。關於火災，阿史就唔介紹過往香港重大火災喇！因為都講過好多次，今次反而想講講香港消防員嘅歷史。

其實香港最初嘅消防隊，係隸屬於差役轄下，即係警隊嘅一部分。

好喇！咁正規嘅消防員同消防處到底係幾時出現呢？答案就係1868年喇！响1868年5月9日刊登嘅香港政府憲報就有以下公告：

「依照法例，總督有權從警隊及其他志願人士中挑選合適者組成一支隊伍，負責本港的滅火工作，以及在火警發生時，保障市民的生命財產，並為該隊伍提供消防車、消防喉、消防裝備、工具及其他必要設備。此舉不但可使該隊伍配備齊全，更有助於提高其工作效率。根據本條例成立的消防隊伍命名為香港消防隊，由香港消防隊監督統領……。」

雖然1868年消防隊正式脫離警隊，但第一任消防隊監督統領，就係身兼警察隊隊長同維多利亞監獄獄長兩職嘅查理士‧梅理，即都係同一個頭頭。

講開又講，除咗隸屬於香港政府嘅消防隊，其實民間亦有唔同形式嘅救火隊。好似响上環一帶嘅南北行就有專門應付火災嘅救火隊，呢樣嘢阿史以前介紹南北行歷史時都提及過。

原圖嚟自網絡