呢個魯班鎖你又識唔識拆？

阿史仲細個果陣，可以玩嘅玩具並唔多，而當年就有一款智力玩具好過癮，簡單幾塊木條組成，但如果唔明白當中嘅原理，就真係可以玩足你一日。阿史講緊咩，就係圖中嘅呢款魯班鎖。

魯班鎖，又叫做孔明鎖，相傳係三國諸葛孔明根據魯班嘅發明而創作而成，結合咗八卦玄學嘅原理，而最初嘅時侯應該係應用响土木建築上，用嚟固定結合，但慢慢就變成一種民間遊戲。最早有記載魯班鎖變成玩具嘅就係响清代嘅一本魔術書《鵝幻匯編》，當時呢款玩具被形容為「乃益智之具，若七巧板、九連環然也。其源出於戲術家」

呢款遊戲係通過利用木塊之間嘅結構「一榫一卯，一凸一凹」而砌成一舊，要拆或者砌，都唔係容易嘅事。最經典嘅形式當然就有「六子連芳」，就有專家計過單係六塊木就已經有12萬種唔同嘅砌法，真係嚇死人。