許留山最初係賣涼茶同龜苓膏？

以賣芒果類甜品知名嘅連鎖式甜品店「許留山」近日就被入稟法院申請清盤，如果真係冇轉機，呢間全港曾經有55間分店嘅「許留山」可能就咁消失喇！「許留山」近年係以甜品而知名，但原來最初係靠賣傳統涼茶起家。

喺1960年代，「許留山」仲未有大規模嘅擴展，只係喺元朗開業，創辦人許先生就以手推車嘅形式喺元朗嘅街頭售賣古方龜苓膏同埋各式涼茶。而去到70年代，因為各種原因，「許留山」就正式入鋪，喺元朗炮仗坊開設第一間涼茶舖，當時都淨係賣緊中式涼茶。

而隨住時代嘅變遷，人嘅口味亦都開始有變化，「許留山」就開始賣埋一啲小食甜品，就好似糖不甩、椰汁、同埋蘿蔔糕咁、亦都有賣埋榴槤同埋山竹，真係幾令人印象深刻。而講到「許留山」最大嘅改變，大概就係1992年推出嘅甜品「芒果西米撈」，當年真係大受歡迎，亦都令到「許留山」以「港式鮮果甜品店」打響旗號。雖然唔知「許留山」最後會點，但佢真係為大家唔少回憶。