新冠肺炎嘅疫情全球擴散，世衛更加將呢次疫情定性為「大流行」，意思即係指大型並且有好高傳染性嘅疫病。而面對呢次疫情，英國首相約翰遜就提出「群體免疫」嘅方法應對，於是就有唔少人諗起1957年英國面對亞洲流感嘅做法。

早排就同大家介紹過百幾年嘅西班牙流感，講返近少少，其實1957年都發生過一次大規模嘅亞洲流感，而呢次死傷當時冇西班牙流感咁嚴重，但全球都有20幾萬人因為流感而失去生命。由於西班牙流感嘅教訓，令到當時嘅社會對公共健康戰略開始改變，唔少國家都設立咗衛生部門，英國理應係一個發達國家，但喺全球因流感而死亡嘅20幾萬人入面，英國就至少佔咗1.4萬人，當中更有900萬個確診病例，因為呢次流感，英國經濟陷入衰退。

咁英國政府當時到底做過乜呢？原來喺1957年嘅時候，英國嘅世界流感研究中心就已經同世界各地嘅實驗室建立咗病毒網絡，但亞洲流感疫情1957年4月爆發，唔夠5個月就已經全球大流行。英國本土就喺6月出現第一宗病例，去到8月就社區大爆發，當時英國對亞洲流感並冇統一嘅治療方案，各個社區都自行其是，而當時嘅媒體就鼓勵公眾自我診斷、自行服藥。之後唔少醫護人員都受到感染，連病房都要關閉，仲有成11萬學童感染病毒。

1957年8月針對呢種新型流感病毒嘅疫苗喺美國投入使用，10月先有少量送到英國。直到1958 年，亞洲流感基本上先至平息，代價相當慘重。

原圖嚟自網絡