三國原來有過「禁酒令」

早兩日港府就提到新一輪嘅防疫措施，當中就提議全港酒吧食肆都禁售酒精類飲品，但點知到咗尋日嘅記者會，呢項措施就消失得無影無蹤。鬼咩，酒喺歷史上扮演住好重要嘅角色，要禁酒並唔係咁容易。

中國歷史上其實有過幾次「禁酒」嘅事件，比較早期係《尚書·酒誥》入面嘅故事，但當時並唔係叫人唔好像油，只係叫衛國嘅人民唔好過度飲酒。而去到西漢嘅時候，就真係出過法律條文，就係由蕭何制定限制人群聚集飲酒，當時就寫明「三人以上無故群飲酒，罰金四兩」，一睇就知刑罰好重。

而講到最出名嘅禁酒令，就係東漢晚期《三國志魏書卷十二》曹操禁酒。禁酒嘅原因無他嘅，就係糧食短缺同埋準備戰爭。要知道每一壇酒背後就係大量嘅糧食，而糧食唔單止對東漢受戰亂影響嘅家庭重要，仲係行軍打仗嘅必需品。於是曹操繼屯田之後，就係禁酒。而因為呢件事孔融就曾經寫過《難曹公禁酒書》表達不滿：「有酒旗之星，地列酒泉之郡，人有旨酒之德，故堯不飲千鍾，無以成其聖」，呢個禁酒令對鍾意飲酒嘅人嚟講，真係相當極端，當時三國魏晉時期仲要係一個嗜酒風氣盛行嘅時代。