「補鑊」原來係一份職業?

依家提起「補鑊」，相信史友們都會諗起係做錯事之後去補救嘅行動，但原來喺舊時，「補鑊」真係一份職業嚟，而且仲係好考技術。

阿史今次所講嘅「補鑊」就真係有隻實體嘅鑊出現，喺以前物資同技術都冇咁發達嘅時候，普通人家屋企嘅鑊係以生鐵整成，咁生鐵嘅特點就係唔耐用，好易穿窿漏水。問題就嚟，當年一隻生鐵鑊都唔係平，如果穿咗窿點算呢？答案就係補鑊喇！

當年喺街頭都會有補鑊佬呢份職業，佢哋會帶埋鐵粉、濕布同埋鎚開工，做緊嘢就係先煮融鐵粉，再慢慢淋喺穿窿嘅位置，等鐵水冷卻凝固之後，再用鎚慢慢打返原形。聽落好似好簡單，但其實要補到平滑、補完都唔覺補過，就需要相當高嘅技術。