介紹完將軍澳嘅地名起源之後，阿史就想同大家講下呢個第三代嘅新市鎮—將軍澳新市鎮。

將軍澳新市鎮同馬鞍山、天水圍都屬同期發展，而將軍澳早喺1982年就已經開始發展，當時嘅人口就只有1萬人左右，而且唔少配套都仲未完善。喺地理上嚟講，將軍激範圍之內係有北邊嘅寶琳、坑口；東南邊嘅日出康城、小赤沙；西南嘅調景嶺同埋南邊嘅市中心，範圍相當大，有成10平方公里。

提起呢幾個地方，就同將軍澳嘅發展史有關。由於新市鎮係提倡自給自足，所以區內並唔止係得住宅，仲會有其他用途嘅規劃。最早發展嘅住宅區係1983年翠林、寶林同埋坑口；至於差唔多時間仲有兩個工業區小赤沙同埋大赤沙，所以將軍澳既有工業邨、又有污水處理廠同埋車廠。

隨住多年嘅發展，呢個新市鎮嘅學校、住屋、康樂設施同埋交通都變得完善，喺2011年嘅統計入面，呢度嘅人口仲超過40萬，而且仲會有新嘅樓盤落成，意味住區內人口仲會繼續增加。

原圖嚟自網絡