經歷過第一次鴉片戰爭之後，中國緊閉嘅大門就被西方以武力嘅形式打開，仲簽落一系列嘅不平等條約，割地賠款之餘，仲要開放「五口通商」。而其中一樣特別要畀英國人嘅最惠國待遇，喺「亞羅號事件」入面，亦都係呢項條款促使第二次鴉片戰爭嘅發生。

喺1856年嘅10月8日，廣東水師就接獲商人嘅舉報，話發現一艘被劫嘅懸掛住英國國旗停咗喺廣州黃埔。講返呢艘商船，其實係一位商人喺珠江被海盜搶走，但後來就有民團搵得返呢艘船，轉輾之下就賣咗畀一位叫做亞明嘅商人，仲登記咗一年牌照，呢艘船就叫做「亞羅號」。

而當廣東巡河水師千總梁國定登船搜索果陣，就發現原來船上嘅執照已經過期十二日，而船上除咗外藉嘅船長，就有十二位涉嫌係走私嘅中國水手。清朝扣起十二位水手，據講仲撕毀英國國旗，以上嘅做法就引起英方嘅強烈不滿，仲要求清廷放還水手及道歉。

事隔兩日之後，兩廣總督葉名琛就答應放出其中九人，但英國駐廣州代理領事巴夏禮就拒絕接受呢個條件。去到10月22日，葉名琛喺英軍提出嘅限時一個鐘前，放出所有水手，但巴夏禮都係拒絕接受，仲將成件事交畀海軍處理。當時嘅駐香港海軍司令西摩就向廣州發起攻擊，炮轟廣州城，呢件就係史稱嘅「亞羅號事件」。而事件之後嘅第二年，就係英法聯合出軍嘅一年。

原圖嚟自網絡