英法聯軍之役遺址—大沽砲台遺址

呢幾日阿史都為大家介紹咗幾段晚清時期發生嘅戰役，咁到底仲有冇相關嘅遺址留低落嚟呢？除咗早前前介紹到嘅虎門炮台舊址，其實仲有一個叫做大沽砲台遺址。

大沽砲台遺址，又或者叫做大沽砲台，係明清年間建立嘅海防軍事防禦設施，亦都係三次大沽口戰役發生嘅立戰場。砲台最初建於明代嘉靖年間，由駐防天津衛嘅戚繼光督造，去到清朝道光年間，就曾經對砲台進行重修，喺南岸加咗三座砲台、北岸亦都加咗兩座，令到整體有大炮台六座，小炮台二十五座，仲有大小炮六十四尊。

1858年5月20日，英法聯軍就喺大沽砲台入侵，以6艘炮艇掩護成千人登陸。清軍當時發炮反擊，殺傷近百位聯軍，但最後砲台都係失守，直隸總督譚廷襄卻棄守逃亡。而去到第二次大沽口戰役，就係1859年6月25日，呢次就係清軍成功擊沉4艘聯軍軍艦。第三次大沽口之戰就發生喺1860年8月1日，英法聯軍陸續攻陷新河、塘沽，跟住由大沽砲台北面進攻，北炮台被聯軍攻下，自此大沽口落入聯軍控制。喺後來《辛丑條約》入面，列強就要求清政府將大沽口炮台拆毀。