古稱龍窩嘅九肚山?

阿史喺新市鎮系列為史友們介紹咗唔少新市鎮，當中就有介紹過沙田新市鎮。雖然係叫做新市鎮，但就有唔少舊物舊地可以再同大家介紹下。據講當年呢個地方係叫做「龍窩」，後來就唔知出於咩原因而改稱「狗肚」，但就因為「狗肚」一詞不雅，決定改稱做「九肚」。

提起九肚山，史友們或多或少都會聽過呢度係傳統嘅豪宅區，唔少城中名人都會選擇住喺呢度。九肚山前身係賽馬會用嚟起建沙田馬場而設嘅挖泥區，但隨住1978年馬場嘅啟用之後，呢個地方就慢慢規劃成低密度嘅住宅區。

九肚山雖然係以豪宅而聞名，但其實入面都有唔少古村，就好似喺清朝乾隆年間由廣東省興寧縣南遷嚟到香港嘅羅氏九肚村、亦都有原名「馬嫽處」嘅馬料村以及長瀝尾村，但當中唔少就因為人口老化同埋交通問題，令到人跡罕見，逐漸荒廢。