香港博物館收藏體積最大展品 葛量洪號滅火輪

香港嘅博物館史友們都可能去唔少，講到香港博物館嘅分館，除咗上窰嘅民俗館之外，仲有一個好特別嘅展覽館，就係阿史跟住想介紹嘅葛量洪號滅火輪展覽館。

葛量洪號滅火輪現時已經係一個展覽館，位處東區鰂魚涌公園內，係一所以香港海上消防歷史做主題嘅展覽館。提到葛量洪號，就咁聽名其實都會知道係以香港總督葛量洪爵士命名。提起呢艘滅火輪其實都有唔少威水史！葛量洪號喺1953年6月30日喺黃埔船塢出廠耗資400萬港元製造，直到2002年退役為止，都仲係亞洲最大嘅滅火輪。

作為消防處主力滅火輪，呢艘身長長38.9米，闊8.8米，高15米，排水量503噸嘅船，船速可達每小時12.5海里。而且船上設有多條救火用嘅中攻喉筆、消防泵等，可以應付大型遠洋輪船高層結構火警，例如1971年珍寶海鮮舫大火、1972年伊利莎白皇后號（海上學府）大火、1986年香港仔避風塘大火都係由葛量洪號撲救。