歐冶子鑄劍呢個題材電視劇就可能睇唔少，咁真係傳世嘅劍到底又有冇呢？原來現世真係有一把號稱「天下第一劍」嘅越王勾踐劍，唔知史友們又有冇睇過呢？佢巴閉嘅地方唔單止係因為佢係屬於越王勾踐同埋有八個字銘文，更加重要係佢當年出土嘅時侯歷經千年歷史都冇生到鏽。

呢把劍係1965年12月喺湖北省江陵縣一座楚墓出土，被考古學家認為春秋時期末年青銅文物，亦都係越王勾踐所用，依家就收藏喺湖北省博物館。呢把劍劍身就只係長55厘米，寬4.6厘米，表面就有黑色菱形暗紋，護手嘅位置當時就已經有藍色琉璃。咁點解學者會覺得呢把劍係屬於勾踐呢？原來劍身上面係有八個字鳥蟲書銘文分別係「越王**自乍用劍」，當中有兩個字早年並無結論，但經過古文字專家唐蘭考證就認為係「鳩淺」，即係「勾踐」通假字，所以成句就係「越王勾踐，自作用劍」。

頭先都講到呢把劍喺出土嘅時侯仲係鋒利無比，咁到底當中又有咩神秘之處？勾踐劍嘅劍身本身係用青銅鑄成，即係混合咗紅銅同埋錫嘅合金，但呢種合金有個缺點，就係好容易被酸、鹼侵蝕，令到劍身表面會形成一層青綠色薄膜，但勾踐劍就冇發生到呢個現象。喺考古學家進一步研究之後，就發現原來呢把劍表面有一層熔點接近2000度嘅鉻，呢種金屬極為罕有而且耐腐蝕，就算喺現代都要去到20世紀先有真正嘅應用，咁點解古人識得用呢？咁就真係一個未解之謎，所以叫得「天下第一劍」真係唔係得個名。

原圖嚟自網絡