早幾日就同史友們介紹到樂富地名起源，而喺樂富範圍入面，其實仲有一個地方地名就已經隱藏住一段恐怖嘅歷史，呢個地方就係橫頭磡。

橫頭磡呢個地名讀落就已經覺得唔太吉利，唔講真係未必知，原來呢個地名嘅命名好大機會係同三年零八個月一段日本侵占香港嘅歷史有關。呢個係口耳相傳嘅傳聞，據講喺日軍侵占香港之後，當時喺老虎岩同埋黃大仙中間嘅山丘，就有一個由日軍建立嘅集中營，而日本軍人對集中營入面嘅戰俘就相當殘忍，一旦被懷疑進行反日嘅行為，都會被帶入軍營並且嚴刑逼供。

咁同「橫頭磡」有咩關係呢？喺果啲戰俘被逼供之後，佢哋都會被帶到一處石磡，然後就會被逼將頭打橫咁放到石磡上被斬首，於是成個橫頭嘅姿態同埋死法，就令到後人將呢道叫做「橫頭磡」。

有住喺樂富一帶嘅史友可能都聽過唔少鬼故，就算冇親眼見過可能都會有啲驚，於是早期搬入橫頭磡住嘅居民就曾經做過大型法事，據講區內嘅福德祠就係由居民集資興建，用嚟超度呢啲含恨而終嘅鬼魂。

原圖嚟自網絡