早幾日阿史就同史友們介紹到「西周九鼎」嘅故事，亦都有同史友們講到佢哋嘅下落之謎。其實關於「九鼎」嘅下落，仲有一個相關嘅講法，就係呢九個鼎被秦始皇拎咗嚟整「秦朝十二銅人」，咁今次阿史就同大家介紹下啦！

「秦朝十二銅人」據史書記載係喺秦始皇統一天下之後，收集天下兵器澆築而成，體積相當大並且設立喺咸陽阿房殿前，由於鑄成無耐嘅銅人表面無受到化學作用侵蝕，所以係會呈金色，於是佢哋又會被叫做「金人」。明眼人都會估到，秦始皇收繳、銷毀民間兵器最大嘅目的就係想長治久安，據講亦都係因為一首童謠「渠去一，顯於金，百邪辟，百瑞生」而令佢覺得有吉祥鎮定心神嘅意味，咁問題嚟喇，理應體積好大嘅銅人，依家又去咗邊度呢？

由於歷代都冇發現「秦朝十二銅人」下落，所以就流傳唔少推測，主流就有三種講法：

第一種講法就係話，由於「秦朝十二銅人」都係秦始皇嘅心頭好，所以喺佢死後就被隨葬喺陵墓入面，而陵墓到依家都仲未開發，所以咪見唔到囉！而第二種講法就係話，喺楚霸王項羽攻克秦都咸陽果陣，十二銅人就連埋阿房官一齊被火燒毀，但呢個可能就受到唔少質疑。至於第三種講法就係指，呢十二個銅人分別有十個係被董卓銷毀鑄成銅錢，至於另外兩個就係後來被苻堅銷毀，係真係假就真係求證唔到喇！

原圖嚟自網絡