日皇「玉音放送」宣布投降

尋日介紹咗日本响1945年8月15日向盟軍宣布無條件投降，而投降聲明就係由當時嘅日本天皇裕仁發布。

其實响1945年8月初，日本先後遭受兩次原子彈攻擊，以及蘇聯向日宣戰，日本戰敗只係時間嘅問題。所以日皇裕仁就响8月14日深夜11時25分開始，响宮內省進行終戰詔書嘅錄音。不過，當時仍有一批主戰嘅軍官，試圖阻止呢段錄音出街。不過呢段錄音最後响第二日即係8月15日透過日本放送協會（NHK）向全國發表，呢段錄音稱之為「玉音放送」。「玉音放送」有一個特別之處，就係日本天皇嘅聲音首次向公眾播出，而「玉音」就係對日本天皇聲音嘅尊稱。

隨住日本向盟軍宣布無條件投降，第二次世界大戰亦宣告結束。