【講開有段故】九龍城有「一筆鵝」同「一筆鶴」？

如果史友們有行過九龍城一帶，應該都會喺聯合道同埋東頭村道之間見過九龍城候王廟，入面就有兩件樣好特別嘅古物，唔知史友們又有冇入過去睇呢？冇錯喇，阿史想講嘅正係「一筆鵝」同埋「一筆鶴」。

昔日嘅侯王廟所在地係被稱為白鶴山，白鶴山亦都有一個別稱叫做「鶴嶺」，咁同「一筆鵝」、「一筆鶴」有咩關係呢？原來喺廟宇嘅後山，就有一個亭同埋巨石，上面就分別有用書法一筆寫成嘅「鵝」同埋「鶴」。

「鵝」係由清代文人光緒十三年所書，仲配上一副對聯「古石書鵝摹逸少 名山駕鶴仰侯王」，下款就寫明「羅浮山黃龍觀道人何罡祥、何罡乾勒石、東官黎慶書」；至於「鶴」就係一個石刻，係由另一位文人喺光緒十四年書，當時留嘅下款就係「澍柱盧潤華書」。

原本廟宇入面就有「一筆鵝」同「一筆鶴」，只係喺日本侵佔香港期間，「一筆鵝」就不幸被毀用嚟變成石材擴建啟德機場，現時大家所見到嘅中式方亭入面嘅「一筆鵝」就已經係1970年果陣摹刻。

原圖嚟自網絡