大約十幾年之前中國考古界就有一單重磅消息，就係河南省文物考古研究所喺河南安陽市一帶進行發掘，過程中就清理咗兩座墓葬。經過一段時間嘅研究同驗證，2009年果陣國家文物局就認定其中一座墓葬墓主正係曹操，呢個發現亦都令到「安陽曹操高陵」呢個項目被列入「2009年度全國十大考古新發現」。

時隔接近十一年，呢個墓葬遺址又一輪新搞作。繼早前被設為臨時展館之後，曹操高陵墓葬遺址就喺2013年成為第七批全國重點文物保護單位，近排就宣佈已經完成高陵本體保護同埋展示工作，好快就會有一個三國文化遺址公園出場！

曹操所在嘅二號墓整體係坐西朝東，墓壙平面就好似一個梯形，佔地有740平方米。既然係曹操嘅墓，規格上當然唔簡單，單單係石門就已經有三層嘅封門磚，墓室入面仲有分成前後、南北各兩室，入面就充滿精美嘅石刻，能夠辨識到「神獸」、「七女復仇」、「宋王車」等等嘅主題。經過鑒定之後，呢個墓入面一共就有三個人頭骨，當中有一個正係60歲左右嘅男性，其餘就係50歲同埋20歲嘅女性。

值得一提，其實呢個墓經歷過多次嘅盜掘，但近年嘅考古發掘仲可以搵到唔少遺物就好似禮器、車馬雜器、陶瓷器同埋刻銘石牌，其中刻銘石牌仲有清晰嘅「魏武王常所用挌虎大戟」、「魏武王常所用挌虎短矛」等銘文。雖然對於曹操墓嘅認定歷年嚟仲有唔少質疑，但喺經過對刻銘石牌、銘文、文獻同埋墓葬規格等等進行研究，基本上真係已經認定墓主係曹操喇。

原圖嚟自網絡