美國十三大殖民地 曾經有個抗英組織「自由之子」？

呢排經常都會睇到同中美貿易戰相關嘅新聞，美國方面仲作出唔少「制裁」嘅行動，但原來唔講唔知，呢種「制裁」嘅方式早喺佢哋立國之前就已經學識，當時促使呢件事、甚至美國獨立戰發生，都同一個組織有關，就係喺美國十三大殖民地成立嘅抗英組織「自由之子」。

「自由之子」（Sons of Liberty）係美國獨立革命期間成立嘅一個為反抗英國統治嘅組織，由亞當斯兄弟創建，分佈喺當時未立國嘅北美十三大殖民地之上，呢個組織成立嘅目的就係想推動殖民地嘅基層同英國王室對抗，當中就用咗唔少暴力同破壞嘅手段，早期就曾經抗擊英國政府嘅非法徵稅，推動過廢除1765年《印花稅法》，後來仲發動過著名嘅波士頓茶黨事件，後來事件就一發不可收拾，令到美國獨立戰爭爆發。

咁呢個組織又同「制裁」有咩關係呢？原來自從英國向北美殖民地嘅商人收取重稅之後，「自由之子」就嘗試同十三地嘅商人達成一項「不進口協議」（Nonimportation Agreements），全面杯葛英國商品，呢個舉動到立國之後直頭做埋美國嘅國策，真係估佢唔到。