消失的古國——古蜀國

之前就同史友們提到一個喺沙漠之中消失嘅古國樓蘭，而喺古代同樣都有唔少好神秘嘅古國，喺甚少文獻記載之下，要通過後來嘅考古發掘先可以勉強知道當中嘅一啲歷史，今次阿史就想介紹一下古蜀國。

古蜀國，亦即係仰韶文化發展出嚟嘅半坡類型，繼承呢種文化習俗嘅先民遷到入四川盆地之後而建立嘅國家。傳說嚟講，呢個國家就係喺公元前3000年，因為黃帝娶蜀山氏女子爲妃，生咗蠶叢，於是呢個地方最早嘅先王就係蠶叢。後來喺周武王伐商紂果陣，古蜀亦都喺牧野戰場上幫過手。呢個國家後來經歷過咩事就真係冇人知，只係去到前316年，秦惠王派大夫張儀、司馬錯率師伐蜀，當場就殺咗蜀王，冇幾耐就滅埋古蜀。據講蜀國後人有去到嶺南建立過甌雒國，但後來都係被南越國所滅。

據目前考古發掘所知，古蜀其實係一個同中原華夏部落唔同嘅一個部族，有住一種好獨特嘅符文叫做巴蜀圖語，至於呢種係咪古蜀文字就仲未解讀到。雖然古代文獻對古蜀嘅記載並唔多，但其實呢個古國都經歷過唔少朝代，現存有幾個好重要嘅考古學遺址，就好似寶墩文化、三星堆文化同埋金沙文化，當中仲有好多未解之謎，唔少文物嘅細節都相當有意思，有機會再同大家介紹下。