呢幾日就發生咗一宗令到文物保護界好有震撼嘅消息，就係被列為三級歷史建築嘅前流浮山警署喺未經任何許可之下就被塗鴉，而且被塗鴉嘅位置更加係一個好標誌性嘅「入彈處及退彈處」位置。

由於圖入面嘅呢個塗鴉出現喺一個咁重要嘅位置，完全覆蓋原有英文字句同埋數目字，事件就引嚟大批保育人士同埋攝影愛好者批評，公開指責塗鴉團隊破壞具有歷史價值場景，而事後塗鴉者亦都就呢件事道歉。

能唔能夠復原到呢個位置就仍然係未知之數，呢座前流浮山警署現時就係三級歷史建築，建於1962年，由於建築物位處山頂位置，所以多年嚟都係用作監視邊界監視偷渡活動嘅前哨同埋行動基地。而去到2000年，呢座警署喺編制上就轉移到天水圍警署，自此空置咗之後就先後做過唔少電影嘅拍攝地。

現時呢座建築物就被納入第五期活化計劃，2018年就批咗畀香港導盲犬協會活化為「香港導盲犬學苑」，預計會喺2023年開始營運，當中唔少有特色嘅部分好似入彈處、槍房、羈留室、保安塔等等都會保留。

原圖嚟自網絡