呢排阿史就同史友們介紹唔少嘅考古遺址同埋古墓，咁關於呢啲古墓古穴，好多時候都可以喺入面見到古人嘅信仰，其中一樣最明顯同埋流行嘅就係長明燈。

喺中國民間流傳住好多嘅講法，都提到古時嘅墓穴入面會放置長明燈，顧名思義呢類長明燈就係即使被放喺密閉嘅空間入面，都會一直燃點永不熄滅，亦都係象徵緊人嘅靈魂不滅。喺現代嘅常識嚟講，密閉空間入面要令要燈長期燃點基本上冇可能，咁到底呢件事喺古代有冇可能成真呢？

喺《史記》對於秦始皇墓就有一段記載「以人魚膏為燭，度不滅者舊之」，意思係指喺呢個墓入面嘅長明燈係以蛟魚油膏製成，可以燃點好耐都唔會熄滅。雖然秦始皇墓目前仲未開發，但根據其他地方嘅考古證據就發現，呢類長明燈一般都有幾個特點：

第一個特點就係有雙層結構，內部就係裝有用醋泡製嘅燈芯同燈油，外層就係裝水用嚟冷卻燈油，咁樣做就可以令到燈芯保持低溫、燈油甚少揮發。而且「以人魚膏為燭」亦都係關鍵之處，呢種油脂耐燃燒，要做到長時間燃燒係有可能嘅。至於係咪可以做到不滅呢？呢度就有個有趣嘅地方！

當考古學家入到墓入面，長明燈基本已經熄滅，但就因為燈芯上面有住白磷呢類化學物質，當古墓再次開啟並且流入氧氣，就令到白磷遇氧自燃，於是就有個錯覺令人覺得古墓長明燈好似千年不滅咁！

原圖嚟自網絡