提起古代中國嘅一啲地域概念，相信史友們都會諗起一堆字眼，就好似阿史之前介紹過「中原」、「天下」等等，而當中其實仲有一個概念都幾值得同大家去介紹一下，就係「九州」喇！

「九州」，又被叫做禹跡、相傳係由夏后氏首領大禹所劃分。關於呢個地理概念最早就喺先秦嘅典籍《尚書·禹貢》《爾雅·釋地》《周禮·職方》等等都有記載，但係唔同典籍入面就存在唔同講法，對後世中國嘅政治同埋文化都有重大嘅影響。而提起呢個地理觀念，經常都會被引用到嘅就係《尚書·禹貢》所講述嘅「九州」，即係冀州、兗州、青州、徐州、揚州、荊州、豫州、梁州同埋雍州。《尚書·禹貢》後來去到漢代仲因為漢武帝「罷黜百家，獨尊儒術」而有住獨得嘅地位，被供為「古今地理志之祖」，於是就成為歷代學者用嚟考證嘅重要典籍。

雖然係有《尚書·禹貢》作為重要嘅參考，但由此唔少等先秦典籍都有對九州區劃進行論述，當中存在差異，例如，《爾雅·釋地》《周禮·職方》《呂氏春秋·有始覽》嘅九州並冇提到梁州而併入咗雍州，又例如東漢經學家馬融、鄭玄仲提出過「十二州」嘅講法，所以點樣分都真係好難講得清。

原圖嚟自網絡