早幾日阿史就同大家提到新中國成立之後，80年代就有改革開放以嚟第一張股票「深寶安」，但其實股票呢個概念好耐之前就已經傳到入中國，清朝嘅時候亦都試過！

提起呢張股票，就要講到招商局同埋北洋大臣李鴻章。喺清末嘅時期，晚清就受到列強嘅欺壓，對方嘅船堅炮利就令李鴻章意識到要盡快設局購船、增強國力。於是，佢喺1872年12月23日就向同治皇帝上奏《設局招商試辦輪船分運江浙漕糧由》並且幾日之後就得到批准，建立輪船招商局。

輪船招商局就即係依家嘅招商局前身，係當時官督商辦企業，喺洋務運動入面第一家現代化以及民族工商企業。呢間局認真經典，中國第一艘洋船「伊敦號」、第一條鐵路、第一條電話線都係由佢哋開創，而股票亦都係！

喺1872年果陣，輪船招商局成立之際，李鴻章就向當時上海社會以社會招股集資嘅方式，為招商局籌集資金，最早嘅股票就係咁樣出現；而去到1882年，招商局向民間開放股權，唔少民眾都有份投資買股票，而呢批民眾唔少就因為1881招商局開平煤礦投產呢個利好消息，手持嘅面值100兩嘅股票就升到150兩，仲曾經有人出到200幾兩想買入，呢個就係當時嘅股票市場喇！

原圖嚟自網絡