《長恨歌》驪宮遺址出土

讀書果陣，唐代詩人白居易果首《長恨歌》喺唔少課文練習果度都會經常被提到，呢首千古絕詩就就提到「驪宮」當年嘅宏偉盛況，當中仲有句係講到「驪宮高處入青雲，仙樂風飄處處聞」，聽到都想入去試下住！

「驪宮」其實就即係華清宮朝元閣，呢座宮殿亦都係果位「楊家有女初長成，養在深閨人未識。天生麗質難自棄，一朝選在君王側」嘅唐代楊貴妃被專寵嘅地方，呢個遺址其實係唐玄宗同埋楊貴妃多次一齊出現嘅地方，而考古人員近日就真係清理咗呢座宮殿遺址。

喺2018年開始，其實陝西考古隊已經對西安市臨潼區驪山西繡嶺進行考古發掘，歷時兩年就成功發現同埋清理出朝元閣遺址嘅主體建築、東西兩側踏道、廊房，成個範圍嘅面積達到2,000平方米，係迄今為止唯一一個唐代高台建築遺址。呢個遺址保存都仲算良好、仲保留到唔少蓮花紋鋪地磚、銘文板瓦、地栿、木構件同埋壁柱，為考古學家提供咗唔少「一手資料」去研究經濟文化發展高峰嘅唐代建築。