又係時間同史友們介紹下香港一啲古地名，今次就同大家講下烏溪沙啦！如果問到新石器時期香港呢個地方嘅聚居地，可能有唔少史友都答得出長洲、黃竹坑、蒲台島，但原來烏溪沙一帶當時都有人類居住過！

烏溪沙嘅位置即係依家沙田區內、鄰近馬鞍山嘅一塊沖積平原，呢塊平原唔單止係泥沙、仲有山上流落嚟鐵礦，所以就有烏溪沙呢個叫法。唔講唔知，其實以前呢道就因為客籍村民方言嘅問題，而被叫過做烏龜沙或者烏雞沙，兩個名聽落都真係幾得意，仲喺清末地圖圖書入面出現過。

如果就咁計文字記錄嘅話，喺嘉慶《新安縣志》入面就有出現過烏溪沙呢個名，但按照考古人員喺馬鞍山、烏溪沙一帶進行嘅發掘，就搵過唔少新石器時代後期嘅一啲文物，印證住當時烏溪沙係有人聚居。

嚟到近代，由於地理位置嘅關係，烏溪沙曾經成為前往大步墟嘅街渡碼頭點，踏入1980年代末期，亦都因為馬鞍山新市鎮嘅開發，唔少前往沙田同埋馬鞍山嘅道路都開通晒，慢慢仲成為私人住宅區域。

原圖嚟自網絡