亞洲第一條纜索鐵路——山頂纜車

近呢幾個月以嚟，由於疫情嘅關係令到唔少本來應該大排長龍嘅旅遊景點突然之間冇晒遊客，阿史亦都乘機去搭一搭好多年都冇搭到嘅山頂纜車。山頂纜車，連接住中環花園道至太平山爐峰峽，路軌全長就只有1.4公里，但其實喺海拔28米到396米以4到27度咁上升，第一次搭都真係有啲震撼。咁問題嚟喇，到底點解冇啦啦要搭架纜車上山頂呢？

原來喺香港開埠初期，來往太平山到中環之間最主要嘅交通工具就係得轎，時間耐之餘亦都相當依靠人力。於是，喺1882年立法局議員伍廷芳就提議喺港島興建一個電車系統，好快就得到當時同為立法局議員嘅香港總商位主席奇利贊臣贊成，並且同年就提出草案。

山頂纜車嘅路線最初都有幾種唔同設計，但最後出錢嘅財團就只係想興建花園道至太平山爐峰峽呢一段，於是就喺1885年9月開展工程，最後喺1888年5月30日就通車，早期仲係用緊蒸氣渦爐推動，後來慢慢就轉做架空電纜，近排仲話會更換新車型，所以都有唔少纜車迷專程上去睇一睇。