日佔時期曾經展開「獻銅運動」？

早排阿史都同史友們介紹唔少日佔時期嘅政策，就好似強逼學生進行「皇民化教育」、全港推行「歸鄉政策」、以軍票取代本地貨幣等等，呢啲政策都令到當時民不聊生，甚至唔少人仲因為咁而失到性命。如果提到當中一樣奇怪嘅政策，就當然係「獻銅運動」啦！

要知道日本本土其實就冇太多嘅天然資源，喺實行南方作戰之後，日本就主要喺馬來亞以及印尼等等嘅東南亞地區搜刮資源。至於香港就有啲唔同，本來就已經冇乜礦產，日軍就只能夠繼續開採蓮麻坑鉛礦、針山的鎢礦同埋馬鞍山礦場磁鐵礦運返本土用。

隨住太平洋戰爭爆發，戰爭規模擴大亦都增加咗軍備嘅需求，日軍需要積極擴大武器嘅生產。生產武器就需要有金屬，但東南亞搬刮到嘅物資都滿足唔到需求，咁點算好呢？當時就有日軍諗到，喺香港同埋各個佔領地發起一場「獻銅運動」，以捐獻為名將市民手上嘅銅製品充公，再運返日本本土熔化製成武器。當時大量平民嘅家居用品都被搶奪，就連維多利亞女皇銅像、昃臣銅像、匯豐銀行嘅兩隻獅子都被拆卸運返日本，部分銅像更加被製成武器，而部分就喺戰後成功喺日本搵返。