連接住新界西荃灣同埋沙田嘅唯一隧道城門隧道，由此收費平同埋路線方便，三十年嚟都係唔少駕駛人士經常行駛嘅隧道。呢條隧道喺1987年2月開始動工，去到1990年4月20日啟用，但就喺啟用冇耐發生咗一件大事！

有返咁上下年紀嘅史友們可能都聽講過，1991年6月24日，大埔廣福道就有一班匪徒帶齊真槍實彈去到廣福道嘅一間珠寶金行搶走接近一百五十萬珠寶首飾。但點知當佢哋以為得手嘅時候，一出門就遇到巡邏嘅警察，雙方就喺街上駁火，劫匪就連手榴彈都掟埋出嚟，最後就喺脅持人質嘅情況下上到一架新界的士。

劫匪登上咗新界的士，一路喺吐露港公路去到大圍一帶，沿途就有唔少警車追住佢哋。雖然唔知佢哋目的地係想去邊，但係佢哋中途亦都「好遵守」交通規則轉返架市區的士，仲向城門隧道方向前進，而當時已經有警察喺隧道口等緊佢哋。

當劫匪到達隧道口，又係一輪槍戰，劫匪敗走去到香粉寮村一帶。由於佢哋當時手持槍械同埋炸彈，警方就派出大批警員入村、用齊催淚彈、照明彈，仲出動埋空軍直升機。喺經過六個鍾搜索，最後喺晚上九點捉到呢三個劫匪，呢場就係喺城門隧道口上演嘅警匪槍戰喇！

原圖嚟自網絡