尋日網絡上就瘋傳幾段短片，影片入面原來就係國家主席習近平到訪廣東潮州牌坊街，並且喺街道上同當地民眾進行交流互動，當中佢就提咗唔少潮州嘅特色產物，其中佢講到自己喺福建多年，最鍾意就係飲「工夫茶」，更加引起當地民眾興奮鼓掌。到底點解「工夫茶」福建同潮州都有得飲？又點解叫做「工夫茶」呢？

講起工夫茶嘅歷史就真係有段講，現時已經係中國國家級非物質文化遺產項目之一，直到今日已經有成千年歷史。「工夫茶」起源於唐代嘅福建，去到宋代仲發展出獨有嘅一套系統，喺福建又或者閩南話入面，「工夫茶」又被叫做「君謨茶」，原因係同一位精通茶道、著有《茶錄》嘅古人宋朝蔡襄字君謨有關。

其實早年呢款技藝並冇一個明確嘅名，去到清朝俞蛟《潮嘉風月記》先開始有「工夫茶」呢個詞；而再早啲嘅唐代馮贄《記事珠》入面雖然都有提到「建人謂鬥茶為茗戰」，但就著重喺技藝方面，真正嘅「工夫茶」係要用到烏龍茶，並且喺「選料」、「烘焙」、「收藏」、「泡茶」、「操作手藝」，甚至係茶具同埋點樣飲都相當講究，所以當中嘅「工夫」亦係解做細緻、講究。

呢項技藝原本就唔係南方盛行，反而係晉唐衣冠南渡之後留低喺南方嘅品茶文化，時至今日就已經成為粵東潮汕地區、閩南地區相當盛行嘅文化。由於工夫茶既講求器具，又要沖水、洗茶、洗杯等工序，難怪習主席都話「沒有那麼多閑工夫」！

原圖嚟自網絡