「潮繡」到底有幾出名？

作為廣東考察嘅第一站，國家主席習近平就率先去到潮州，並且喺當地著名嘅牌坊街會見群眾，關於潮州佢就有幾樣好鍾意嘅事物，第一樣就係「工夫茶」、就連潮劇、潮州木雕同埋潮繡都一一提到。喺呢幾樣特色文化入面，潮繡唔單止喺國內出名，而海外都有唔少人認識。

所謂潮繡其實就即係潮州刺繡，屬於潮州、汕頭嘅傳統工藝，喺中國傳統嘅十大刺繡體系入面，潮繡就被歸納入去粵繡入面。呢種始於唐、宋年間嘅技藝，講求嘅係用金線、銀線、絨線混合針，去繡出均衡對稱、金碧輝煌嘅圖案。由於潮州人個性上都係熱情、勤勞，所以潮繡嘅主題經常都係同啲美好嘅願景、喜慶有關，龍、鳳、獅子、喜鵲、牡丹等都係常見嘅題材。

潮繡去到明、清年間最為盛行，全盛時期潮繡針法仲發展到200幾種，認真誇張！唔單止國內收藏家鍾意，喺乾隆年間潮繡廣銷南洋，歐洲各地，就連19世紀英國藝術家波西爾所著《中國美術》入面都有提到廣東人有一種技藝係特別岩用嚟刺繡花鳥，而呢種技藝正係潮繡。