早幾日就係赤松黃大仙師寶誕，提起呢個香港咁重要嘅信仰，阿史就諗起一件好特別嘅事！無論係警匪片定係現實嘅警署，早喺三十年代開始警隊就開始有拜祭關帝嘅習慣，而且每逢有人升職、破大案都會特別舉行一啲拜祭儀式。唔講真係唔知，原來全港咁多間警署入面，黃大仙警署並冇拜祭關公，反而係獨拜黃大仙，到底當中有咩原因呢？

其實當中嘅原因就唔使諗得太複雜，純粹係因為黃大仙警署呢個環頭入面有座黃大仙廟喺度，而喺1964年果陣由於區內治安都麻麻，所以當時嘅警層高層就諗，如果有座黃大仙廟喺區內但就走去拜關帝，好似有啲奇怪，於是最後就決定設立一個「黃大仙廳」恭請黃大仙坐鎮。

每隔幾年，黃大仙警署內都會舉行大型儀式拜祭黃大仙，仲會請來一眾道士奏樂誦經，相當熱鬧。唔講真係唔知，黃大仙警署入面嘅黃大仙畫像仲係由當時一位警員親手畫架！

原圖嚟自網絡