龍景銓係李我徒弟？

前日就係滙豐總行大門嘅一對銅獅子「史提芬」同埋「施迪」重見天日嘅日子，阿史就講到負責風水儀式嘅果位老人家大有來頭，佢其實就係滙豐御用風水顧問龍景銓，唔單止香港嘅滙豐風水係由佢睇，就連英國同埋上海嘅新總行都關佢事，甚至馬會、唔少城中名人都係搵佢睇風水。而提起呢位風水師，就有傳言指佢其實係殿堂級播音員李我個徒弟喎！

當時阿史睇到嘅網上傳言係話，呢位政商界御用風水師龍景銓拜過一位師傅，佢嘅師傅唔係咩普通人，而係四、五十年代風靡省、港、澳嘅播音皇帝李我。而再講埋落去，仲提到李我叔係風水大師賴布衣廿六代真傳弟子，所以其實李我都精通風水命理。

咁李我自己又係點樣描述同龍景銓嘅關係呢？喺「李我講古系列」原來有提過架喎！李我就表示自己同龍景銓雖然相差二十幾歲，但就係交情好好嘅朋友，以往亦都有傳媒影過李我夫婦同龍景銓一齊食飯，但李我就冇提過龍景銓係佢嘅徒弟，而龍景銓風水命理上嘅師傅係南海地師任志林，龍景銓亦都係任志林唯一一個徒弟，所以「龍景銓係李我徒弟」，可能就唔係風水命理方面嘅徒弟啦！