「百年老店排行榜」香港太平館餐廳榜上有名？

話說近排內地傳媒就整理咗「中國餐飲老店排行榜」，喺呢份排行榜入面就列出咗30間老字號嘅美食店，當中就包含咗中華八大菜系，而其中連香港嘅食店都榜上有名，阿史所講嘅正正就係香港太平館餐廳。

其實之前都有同史友們介紹過，呢間太平館餐廳其實就係始創著名嘅豉油西餐，而佢最初創立嘅地方就係1860年嘅廣州太平沙。呢間喺廣州最早出現嘅華人自營西餐廳，係由曾經擔任過旗昌洋行西廚嘅徐老高先生所創立，佢辭職之後就喺街邊肩挑販賣，當時仲好大膽咁用到中式醬油、西式烹調方法炮製食物，結果大受歡迎之下就喺1860年廣州城南菜市場附近置業開舖，以豉油汁烹調豬扒牛扒、燒乳鴿等等菜式，後來仲有埋頭號招牌梳乎厘，滿清官員、洋行買辦都係佢嘅客人，即使去到後來戰亂，太平館仍然名聞南粵。

去到日本侵華之後，太平館第三代徐漢初兄弟就嚟到香港另設新店，先喺1937年上環成立第一間「省港太平館」，時至今日「太平館」喺香港已經有四間分店。