山西黃河岸 4500年前有座古堡遺址?

早幾日阿史就同史友們介紹到埃及有過百具彩繪木棺出土，而喺差唔多時間，山西省都有啲幾特別嘅考古發現公佈出嚟，就係喺山西黃河岸偏關天峰坪遺址發掘到一個古堡遺址。

考古學者將呢個距今大概4,500年前嘅古堡遺址叫做天峰坪遺址，通過考古發掘同埋航拍技術，大家都可以好清楚睇到成個遺址嘅結構，喺地理位置上嚟講，呢個遺址位處天峰坪鎮天峰坪村東，又喺關河入黃河口附近，係一個有3萬平方米嘅孤懸河岸小型寨堡，即係三面環河而且地勢險要，極為易守難攻。

呢個遺址係舊年10月展開發掘，直到今年8月先至清理到其中1,000平方米，發現到石牆4段、房址近20座、灰坑30餘座、墓葬2座等等，係極為少數嘅擇險而居嘅石城。呢次發現，亦都有利考古學者進一步研究史前黃河兩岸地區嘅居住模式。