响1943年11月23日至11月26日（另一計法係1943年11月22日），由中國、英國、美國三國元首响埃及首都開羅召開咗一次重要嘅國際會議，史稱「開羅會議」。呢次會議係第二次世界大戰中其中一次重要嘅會議，不過响呢個會議裡面，就無「三巨頭」之一嘅蘇聯元首斯大林出席，點解會咁嘅呢？

開羅會議，代號「六分儀」會議，原定為英、美兩國間嘅軍事會議，由時任英國首相邱吉爾提議召開。不過，响1943年10月31月，時任美國總統羅斯福就致電國民政府主席蔣介石，邀請佢前往開羅參加會議，就係咁呢次會議就成為咗中、美、英國元首嘅會議。

至於點解無蘇聯份，就有兩個講法。第一個講法就係話呢次會議當中，三國商討反攻日本嘅策略，以及戰後亞洲勢力嘅安排，呢個亦係羅斯福邀請蔣介石呢位中國戰區主帥出席嘅原因。由於當時蘇聯並無向日本宣戰，所以斯大林就無出席喇！至於另一個講法，就係斯大林覺得蔣介石根本無資格同足夠份量同佢响同會議枱上開會，所以就無出席。結果就係，邱吉爾同羅斯福响開羅會議結束後兩日去咗德黑蘭開另一個會議（德黑蘭會議）。至於史友們覺得邊個講法合理啲呢？自行決定喇！

原圖：網絡