流失海外百多年馬首銅像 重歸圓明園並正式展出

早排就同史友們重新介紹過圓明園十二生肖銅像嘅起源同埋現時已經有幾多個銅像回歸到中國。喺尋日嘅圓明園，就有一項盛事嘅舉行，正正就係圓明園十二生肖馬首銅像入藏儀式。

十二生肖獸首銅像由意大利耶穌會會士郎世寧設計，融合東西方藝術風格，原身就係清朝皇家園林圓明園海晏堂前噴水池一部分。呢個噴水池同時亦都係一個水力鐘，配合十二生肖分成十二時辰輪流報時，一到正午十二時仲會同時噴水，相當壯觀。之但係，喺1860年英法聯軍火燒圓明園果陣，十二生肖銅像被掠奪，至今仍有龍首、蛇首、狗首、雞首及羊首等五個銅像下落不明。

至於今次回歸中國嘅第七尊銅像馬首就係由已故賭王何鴻燊2007年喺拍賣會以近七千萬港元買下馬首銅像，舊年捐贈予國家文物局。同其他嘅銅像唔同，呢個銅像係第一個回歸到回歸圓明園展出嘅銅像，與此同時都有過百件文物一同展出。唔少睇完展覽嘅北京民眾，都大讚呢個一體鑄造嘅馬首銅像工藝震撼人心，亦都受到賭王何鴻燊呢種高尚行為感動。