之前介紹南京保衛戰個陣，就話蔣介石任命唐生智為首都衛戍司令官，負責對抗日軍進攻南京嘅防務工作。雖然唐生智負責守南京就係人都知，不過對於係咪佢自告奮勇，就有唔同版本嘅講法。

上次提及過，响日軍進攻南京前，蔣介石就同國軍高級將領開會商討守唔守南京，結果唐生智就成為首都衛戍司令官，承擔呢個重責。有份開會嘅李宗仁响佢嘅回憶錄就咁講：「唐（生智）忽然起立，大聲疾呼道：『現在敵人已迫近首都，首都是國父陵寢所在地。值此大敵當前，在南京如不犧牲一二員大將，我們不特對不起總理在天之靈，更對不起我們的最高統帥。本人主張死守南京，和敵人拼到底！』唐氏說時，聲色俱厲，大義凜然，大有張睢陽嚼齒流血之概。」之後李宗仁响會後就對唐生智講：「孟瀟，你了不起啊！」唐生智就回話：「德公，戰事演變至此，我們還不肯幹一下，也太對不起國家了！」照咁睇，唐生智的確係响會上自告奮勇要同南京共存亡。

不過，唐生智响生前憶述返呢件事，就有唔多一樣嘅講法，佢就話開會個陣，蔣介石問大家「守唔守」，之後蔣自言自語話「南京一定要守。」又問邊個去守，又無人答佢，佢就話無人守就佢自己守。於是唐生智先自告奮勇話願意守南京。呢個講法就變成咗守南京係蔣介石嘅主意，唐生智見無人肯去守，先仗義承擔呢個不可能的任務，以免蔣介石真係自己去守南京。

咁到底係唐生智自告奮勇，定係佢勉為其難舉手認頭呢？又係羅生門喇！不過，唐生智好快守唔住就係血淋淋嘅事實。

原圖：網絡