港島上首條行車隧道——香港仔隧道

又係時候同史友們介紹香港嘅一啲重要基建，香港第一條嘅行車隧道係獅子山隧道，相信大家都會知道，咁如果問到港島第一條行車隧道，史友們又知唔知係邊一條呢？

答案就係穿過聶高信山貫通黃竹坑、跑馬地嘅香港仔隧道喇！獅子山隧道最早果部分就係喺1961年動工，而呢條香港仔隧道就比較遲，要喺1979年先至動工，兩個管道去到1982年同埋1983年先分別啟用。

喺香港仔隧道通車之前，如果有揸開車嘅史友，應該都會知道如果要由黃竹坑出去銅鑼灣一帶，就要行一條相當迂迴嘅路，由南風道、深水灣道、再去司徒拔道，相當唔方便。而去到70年代，為咗配合南區發展，港府就決定興建呢條隧道，並且喺1982年先通車其中一個管道。隧道喺通車之後冇耐就已經成為咗南區居民出去港島北部嘅重要途徑，每日行車量有成63,646架車次，認真犀利。